أكيد جربتي كتير كريمات عقدتك ومكانتش مناسبة لنوع شعرك، إما تقيلة أكتر من اللازم أو خفيفة وبيمتصها الشعر بسهولة ومبيبنلهاش أثر، ده طبيعي لأن الكريمات دي مش مناسبة ليكي، أو استخدمتيها غلط، انهاردة هنتعرف على أفضل كريم للشعر من حيث نوعية شعرك وتركيبه، وازاي تقدري تحددي النوع المناسب ليكي من غير ما تجربي كتير وتصرفي فلوس كتير.
أولاً: ليه بنستخدم كريمات الشعر بشكل يومي
إجمالاً هيكون كلامنا في المميزات والعيوب عن كريمات الشعر الأصلية عالية الجودة، بعيداً عن الكريمات الاستهلاكية مجهولة المصدر والعلامة التجارية لأن مشاكلها أكتر والمكتوب عليها من مكونات وفوائد كلام غير موثوق.
كريمات الشعر الفايدة الأهم منها هي تغذية وترطيب الشعر والتحكم في مظهره وترتيبه، ولو شعرك كيرلي بتحدد الكيرلز وبتملاها وبتنيم الشعر الواقف، وبتدي شعرك تثبيت ولمعان بيتفاوت مقدارهم حسب نوع الكريم (ده اللي هنعرفه الفقرة الجاية)
ثانياً: أنواع كريمات الشعر
كريمات الشعر بتختلف أنواعها حسب طريقة صنعها، وبيكون ليها شكل تصفيف مميز أهم علامتين فيه هما اللمعان وقوة التثبيت، وده اللي هنركز عليه في الجزئية دي
1. كريم الشعر | Hair Cream
تثبيت منخفض – لمعان متوسط
الكريمات بتدي لمعة طبيعية ومرونة وترطيب للشعر، ملائم جداً للشعر الكيرلي والمجعد وغالباً مكوناتها بتكون زيوت طبيعية وزبدات. صحيح الكريم مبيثبتش التسريحة أوي لكن منتج ممتاز لتغذية الشعر وبيسمحلك تتحكمي في الشعر الهايش وترتبي تسريحتك بدون الإحساس الدهني أو المتصلب بتاع الجل والواكس
2. دهان الشعر | Hair Pomade
تثبيت متوسط – لمعان عالي
الدهان (فازلين الشعر) شبه الواكس في القوام والتثبيت لكن أعلى في اللمعان، وقوامه كريمي أكتر من الواكس وبيلائم كل أنواع الشعر بما فيها المجعد والكيرلي وكمان بيناسب التسريحات المستخدم معاها المشط في التحديد. الدهان مصنوع من زيوت معدنية في الأساس.
دهانات الشعر نوعين حسب الصناعة، دهان شعر ذو أساس زيتي وده بيكون أرخص وفي المتناول أكتر، لكن مشكلته انه بيسيب تراكمات على الشعر والفروة Buildup لو متغسلتش كويس بشكل دوري ممكن تسبب انسداد في مسام فروة الشعر وبثور، وطبعاً احنا عارفين لو الشعراتغسل كتير بيسبب جفاف الشعر لفقدانه الزيوت الطبيعية فيه.
النوع التاني وهوا دهان الشعر ذو الأساس المائي، وده مبيعرضناش لمشكلة التراكمات Build up ومشاكلها، ولكنه أقل ثباتاً لكن يمكن طبعاً إعادة تصفيف الشعر باستخدامه مرات أكتر بدون أضرار كبيرة
3. ليف ان كريم | leave in cream
تغذية الشعر وحماية الشعر باستمرار
منتجات الليف ان جديدة نسبياً في عالم العناية بالشعر، أثبتت فعالية مع صاحبات الشعر الكيرلي في البداية ولكنها مناسبة لجميع أنواع الشعر، تعالي أقولك ع السريع أهم فوايدها
🔮 ترطيب مضاعف للشعر
🔮 فك التشابك وتسهيل تسريح الشعر، وبالتالي حمايته من التكسر والتقصف
🔮 حمايته من أدوات التصفيف الحرارية والعوامل البيئية، بما إنها بتكون طبقة أولية على الشعر
4. حمام الكريم | Hair Mask
تغذية عميقة خلال فترة قصيرة
ماسك الشعر نفس فكرة ماسك البشرة، عبارة عن مرطب مكثف للشعر لإمداد الشعر في فترة قصيرة بالمغذيات اللازمة ليصبح أقوى وأفضل صحياً، ينصح الجميع باستخدامه مرة على الأقل اسبوعياً، لكن بيحتاجه أكتر أصحاب الشعر الجاف والمتضرر من الصبغات والحرارة والعلاج الكيميائي (كريمات الفرد).
المكونات غالباً بتكون زيوت وزبدات طبيعية بتركيز أعلى من الكريمات العادية، طبعاً لا ينصح بترك حمام الكريم على الشعر لمدة أطول من المحدد على عبوة المنتج.
5. سيروم الشعر | Hair Serum
تثبيت قليل – لمعان عالي - حماية عالية
من أفضل المنتجات اللي بتطري الشعر وبتغلفه لحمايته من التكسر والتقصف، و بيناسب الاستخدام قبل تصفيف الشعر بالحرارة، أو قبل باقي منتجات الشعر التانية، أو حتى للاستخدام الموضعي على المناطق المتضررة من الشعر كالأطراف ومقدمة الرأس.
6. جل الشعر | Hair Gel
تثبيت عالي – لمعان عالي
جل الشعر من اكتر المنتجات اللي حازت على إعجاب الرجالة بشكل أكبر، خاصة اللي شعرهم قصير ومتوسط الطول، وبيختلف قوة تثبيته من منتج للتاني، لكن كل ماتزيد قوته كل ماتبان بعض سلبياته زي تقشير الجل بعد ماينشف وجفاف الشعر، خصوصاً كل ماكانت صناعة المنتج أرديء وأقل جودة.
7. زبدة الشعر | Hair butter
ترطيب عالي – لمعان متوسط
منتج من الطبيعة لتغذية الشعر الكثيف و عالي المسامية بكفاءة عالية، كما أن لها خصائص مطهرة تحمي الشعر من مختلف المخاطر المحيطة به
8. واكس الشعر | Hair Wax
تثبيت متوسط – لمعان متوسط
الواكس أقل ثبات من الجل، مشهور عند الرجالة أكتر برضو خصوصاً في التسريحات اللي بيحدد فيها المشط شكل التسريحة لكنه ممتاز للجنسين، بيرتب الشعر ويديله مظهر محدد مش ناشف ومتخشب أبداً، مناسب أكتر للشعر الويفي والمفرود.
9. موس الشعر ....| Hair Mousse
فوليوم للشعر - تثبيت ولمعان خفيف لمتوسط
موس الشعر هوا فوم الشعر مستحضر مهدور حقة جداً، ممكن يكون هوا ده اللي ناقص شعرك وهيوديه في حتة تانية ويغنيكي عن طرق تصفيف تانية مضرة
الهير موس بيتحكم في الشعر وبيحميه وبيديكي فوليوم مرتين أو تلاتة زيادة وكمان بيحدد الشعر ويزيد لمعانه وحيويته من غير كرنشينج أو مظهر دهني أو حتى خيوط الشعر الثابتة بالمشط لو مش حابة ده، السر انك تعرفي تستخدميه صح بكمية مناسبة.
10. طين الشعر | Hair Clay
تثبيت عالي – لمعان قليل
11. معجون الشعر | Hair Paste
تثبيت متوسط – لمعان متوسط
12. بودرة الحجم | Texture Powder
فوليوم عالي – تثبيت خفيف
13. مثبت الشعر | Hair Spray
لمسة نهائية للتثبيت
ازاي تعرفي الكريم المناسب لشعرك حسب نوع الشعر
الشعر المفرود | Straight Hair
أغلب أنواع الشعر المفرود بيكون دهني أو يميل لمنتجات الشعر الخفيفة أكتر، فبلاش سيرم تقيل وزبدات شعر لأن الشعر مش هيمتصها وهيكون شكلها دهني ومش لطيف.
بننصح بالمنتجات اللي بتدي فوليوم زي الباودر والسبراي، وكمان بننصح بالشامبو الجاف | Dry Shampoo هينضف الشعر ويشيل الزيوت الزايدة وكمان هيديله فوليوم حلو أوي.
الشعر المموج | : Wavy Hair
الموجة الخفيفة في نوع الشعر ده جذابة جداً، محتاجين نحافظ عليها لأنها بتديله فوليوم حلو، أولاً في التصفيف ينصح تبعدي عن المنتجات اللي أساسها زيتي أو كريمي، واستخدمي أكتر المنتجات الخفيفة زي الموس وجل الشعر.
وممكن تستخدمي الدفيوزر (جزء يضاف لمجفف الشعر) مع الاستشوار في تجفيف شعرك بيجففه على طبيعته وبيديله فوليوم جميل، حاولي يكون الهوا بارد على قد ما تقدري.
أنواع الشعر اللي جاية كلها يفضل تستخدمي معاها الطريقة دي في التجفيف.
الشعر المجعد (الكيرلي) | Curly Hair
الشعر الكيرلي الجميل، اللي لو عرفتي تتعاملي معاه صح هتحبيه جداً.
أولاً النصيحة اللي ناس كتير مبتسوعبهاش، بلاش تسريح كتير، التسريح المبالغ فيه بيفك الكيرلز وبيقطع الشعر ويكسره، يعني صحياً بيدمره والمظهر كمان مش بيبقة مرتب، طيب هعمل ايه؟
استخدمي ليف إن بعد الاستحمام وسلكي شعرك بأطراف صوابعك أو بمشط واسع جداً ويفضل يكون خشب عالي الجودة مش أي نوع، ولما تسرحيه تاني بلاش تستخدمي المشط.
يفضل تسيبي شعرك يجف في الهواء، لو مستعجلة ومضطرة تستخدمي الاستشوار يفضل بالطريقة اللي وضحناها في النقطة اللي فاتت.
بلاش منتجات مليانة سيليكون وسلفات، أيوه هتحسي انها بترتب شعرك وبتديله مظهر حلو، بس ده مؤقتاً، المنتجات دي صحياً مش كويسة وبتسبب جفاف وتكسر للشعر.
الشعر المتعرج (الكويلي) | Coily Hair
الشعر ده ليه خصائص فريدة جداً، وشكل تسريحاته الطبيعية اللي بتكون عالية ومستديرة تحفة وبتدي جمال وجاذبية لأصحابه، ده غير انها أقرب ماتكون للطبيعة وصحياً ممتازة جداً مبتعرضش أصحابها لمشاكل الحرارة والكيماويات.
يعتبر كمان اكتر أنواع الشعر حساسية واكترها احتياج للعناية خصوصاً الترطيب، لازم تكوني لطيفة معاه وترطبيه بسخاء مش شرط الترطيب يكون زيوت إنما الزبدات وماسكات وكريمات الشعر من أكتر الحاجات اللي بتدي نتيجة تحفة معاه.
بلاش ضفاير وشد مبالغ فيه للشعر، الشعر رقيق وحساس وعرضة إنه يتقطع ويتكسر، وكمان هيدخلك في مشكلة صلع مقدمة الرأس وان الشعر يخف جداً في المنطقة دي.
ينصح بتقليل استخدام الشامبو على قد ماتقدري، ممكن تستبدليه بشطف الشعر بالبلسم أغلب المرات.
وهتسرحيه باستخدام ليف ان مناسب، ونعتمد عليه في التسريح بشكل دائم، هنقسم الشعر لأربع أجزاء، وناخد خصلة بخصلة، ونحط ليف ان على كل خصلة من اولها لآخرها ونسرح بإيدينا ونلف الخصلة على صباعنا ونسحب مع اللف.
هيديكي هيلثي لوك وفوليوم تحفة لتسريحتك.
ازاي تعرفي الكريم المناسب لشعرك حسب مسامية الشعر
أولاً- ماهي مسامية الشعر | porosity hair ؟
معنى porosity أو مسامية الشعر هي مدى قابلية شعرك لامتصاص الرطوبة، هل مساماته مفتوحة جداً والا مقفولة
مسامية الشعر العالية | high porosity hair
مسامية الشعر العالية سببها إن سطح الشعره عليه ثقوب كتير | cuticle والثقوب دي بتسبب:
- زيادة احتياج الشعر للترطيب
- وزيادة سرعة فقدانه للرطوبة اللي اكتسبها.
وده ممكن يكون طبيعة الشعر في الأساس، أو إنه اتأثر بالحرارة والكيماويات واتغير تكوينه وزادت مساميته
تقدري تتغلبي على مشكلة مسامية الشعر العالية باستخدام منتجات غنية بزيدة الشيا زي الليف ان والبلسم، الحاجات دي بتملأ مساماته وتخلي التحكم فيه أسهل كتير.
مسامية الشعر المتوسطة | medium porosity hair
مسامية الشعر المتوسطة بيكون الشعر فيه معتدل في احتياجه للترطيب ومبيفقدش الرطوبة اللي اكتسبها بسرعة.
مسامية الشعر المنخفضة | low porosity hair
مسامية الشعر المنخفضة سببها إن سطح الشعره أملس ومساماته مقفولة تقريباً
وكمان الشعر بيمتص الترطيب أكتر باستخدام البونيه الحراري لأن الحرارة المعتدلة بتخلي الشعر يمتص الترطيب ويستفيد من المنتج لأقصى درجة بدون ضرر حرارة الاستشوار العالية
ثانياً- اختبار مسامية الشعر | hair porosity test ؟
اختبار مسامية الشعر سهل جداً ومش بيحتاج منك وقت أو مجهود عشان تعمليه:
- اختاري كم شعرة كاملة (مش اطراف بس)
- ضعيهم في وعاء من الماء
- استنيهم دقايق يستقروا
- تعرفي ان مسامية الشعر عالية لو الشعر غرق أسفل الوعاء
- الشعر اللي بيطفو ده مساميته منخفضة
- الشعر اللي مساميته متوسطة هتلاقيه في نصف الوعاء
ازاي تعرفي الكريم المناسب لشعرك حسب كثافة الشعر | hair Density
كثافة الشعر أمر نسبي محكوم بالجينات وبيتأثر بالهرمونات والتوتر والحمل والرضاعة ونوعية الغذاء، وبيختلف أحياناً في فترة إنقطاع الطمث | menopausing.
الشعر عالي الكثافة
نقدر نقول ان الشعر كثيف لو مكانتش الفروة ظاهرة بسهولة، ولما بنفرقه بيكون الشعر متقارب ومغطي أغلب مسامات فروة الرأس.
لو شعرك مساميته متوسطة وعالية تقدري تستخدمي منتجات تقيلة براحتك وأي حاجة مناسبة مع شعرك أياً كانت تقيلة أو خفيفة، في العناية أو التصفيف اليومي.
الشعر منخفض الكثافة
أما الشعر منخفض الكثافة فده بتقدري تشوفي الفروة حتى لو مكنتيش فرقاه خصوصاً كثافة الشعر من الأمام بتكون قليلة جداً عن باقي الشعر.
مع الكثافة المنخفضة هنعتني بشعرنا كويس جداً بالمنتجات المناسبة ليه حسب مساميته، ولكن في التصفيف مش هنستخدم منتجات تقيلة نهائي
ختاماً نتمى تكونو استفادتو من الموضوع قد ماحطينا فيه جهد ووقت، لو فيه أي سؤال أو اقتراح سيبيهولنا في التعليقات تحت. ونرجو مشاركة الموضوع مع حد ممكن يستفيد منه، وخليكوا فاكرين إن ربنا خلقنا وميزنا باختلافنا، مفيش صورة أفضل وصورة أسوأ، اعتني بنفسك أولاً وثقي فيها ثم مظهرك ومتسمحيش لحد مهما كان مين يشكك في جمالك ويأثر على سلامك الداخلي.
- Image by lookstudio on Freepik
- Image by Freepik
- Image by Freepik
